中環出更：工藝師爺爺啟發 靳埭強與藝術結下不解緣
地球污染愈見嚴重，氣候變化成為大家關注嘅問題。由海港青年商會舉辦嘅本屆國際兒童繪畫比賽中，就以環保為主題，希望參加者可以通過創作，了解氣候變化對地球帶來嘅影響，並引導大眾為地球健康出一分力。本地著名設計師靳埭強就係繪畫比賽嘅首席評審，日前佢就分享咗今次比賽嘅特別之處。
靳埭強提到，自己喺番禺農村出生，由身為工藝師嘅爺爺陪伴佢長大，耳濡目染之下就對藝術結下不解緣。佢又話所謂藝術靈感，並非天跌落嚟，而是八卦番嚟。佢笑言，由於自己熱愛生活，平日見到有感受、觸動嘅事物，就會儲入心裏變成記憶，每日累積，當有需要時就會用得着。另外，因為疫情關係，參與今屆比賽嘅小朋友無法像往年一樣即場繪畫，評審即場評分，取而代之就喺家中創作，加上郵寄延遲，海外組別收集畫作過程同樣遇到困難，部分更因此錯過比賽。
盧苡嘉籲商界多辦兒童繪畫比賽
海港青年商會會長盧苡嘉就話，比賽有國際參加者絕對係好事，因為不同地區、國家嘅小朋友，就算選擇同一描繪對象，畫風及表達手法都好唔同，大家可以透過比賽了解多啲，進行文化交流。佢仲話，其實本地兒童都好有天分，最重要係畀多啲空間同機會佢哋發揮，而民間團體、商業機構等，亦應更積極去籌辦類似活動，提供平台畀呢批喜歡畫畫嘅小朋友。
今次比賽，世界少年組冠軍呂倬瑩亦即場向大家分享佢嘅作品，幅畫係一個受污染嘅世界，入面有垃圾、工廠及水污染等，氣候變化嚴重，但呢啲都發生喺一個「罐」入面，寓意環境破壞唔好再惡化，依家拯救亦為時未晚。而幅畫佢就花咗個幾月完成。現年十五歲嘅呂倬瑩，平日都有為環保出一分力，雖然唔敢話做得好徹底，但都會秉承勿以善小而不為嘅道理，譬如喺屋企會盡量節省水電，慳得就慳咁話。
卓妮