中環出更：薛浩然出書「抄」作 何君堯斥不務正業
新界鄉議局執行委員會會議尋日召開，但作為執行委員之一嘅何君堯就因為一本書「辣着」，會後仲喺社交網站貼文，圖文並茂咁鬧爆該書作者，即係已故「新界王」劉皇發嘅妹夫、鄉議局研究中心主任薛浩然不務正業，話佢浪費晒鄉議局嘅錢，建議鄉議局係時候要節流，唔好要呢啲冗員喎！
內容從馬會資料庫取得
何君堯以「鄉議局是時候要節流」為題，講到話尋日開會，有一本名為《香港馬照跑─東西文化融匯下的香港賽馬事業》嘅書放喺枱面，而呢本書正係由薛浩然所著，話獻畀佢妻子。但書中大部分講述英國賽馬文化、起源、發展以至香港賽馬發展等，全部都從馬會資料庫、其他史籍或政府檔案中取得，仲話基本上毋須太大嘅思維能力，全部都係「抄」作喎。
何認為呢啲嘢不值一文，又話替作者感到難為情，竟敢開口要求索價一百六十八元一本，鬧爆話呢本書同鄉議局毫無關係，唔明白點解要放喺會議枱上。最後仲話支取過百萬元薪水嘅薛浩然不務正業，為馬會出書，浪費晒鄉議局嘅金錢喎，建議鄉議局係時候要節流，唔好留冗員咁話！問番薛浩然點睇件事，佢就話真係要認真睇吓對方講咩，稍後再作詳細回應。
卓妮