政情：紓困非派糖 麥美娟籲針對性救市
疫情近日雖稍為緩和，但社會上仍有聲音要求政府再度推出紓困措施。議員麥美娟（Alice）前日喺一段網絡視頻中指出，由去年嘅反修例事件以至今年嘅疫情，好多打工仔都失去飯碗，對於失業人士而言，紓困措施唔係派糖，而係救命草咁話。
Alice話明白兩輪防疫抗疫基金同全民派錢之後，政府面臨財政赤字，因此紓困措施應該係針對支援受影響嘅行業，如飲食、零售、旅遊等，其中又以航空業及其相關嘅工種可謂重災區，好多工友都冇工開，手停口停。相較之下某啲行業如公營機構嘅員工，就會冇咁迫切。
Alice又話紓困措施只係解決燃眉之急，打工仔長遠而言係要有工返。鑑於近來多咗人透過網購嚟做生意，Alice相信疫情勢必改變舊有嘅消費模式，所以佢主張政府成立委員會，研究點樣適應國際經濟新格局，早作準備以迎合日後嘅轉型同挑戰。