話說港交所日前向券商發信，話明白目前嘅經濟環境，因此決定向各交易所參與者提供港幣一萬元嘅扣免額。而張華峰尋日就喺社交平台貼文，話講到筋疲力竭，都只係得一萬元，八百間券商合共都係八百萬，同港交所年賺一百億嘅對比下，實在令人失望。又指港交所有咁亮麗嘅業績，有賴一眾券商嘅貢獻，希望港交所以後還有紓困減免嘅空間。
值得一提嘅係，早前有指港交所總裁李小加，明年十月約滿後不再續任，而四個月前張華峰就喺網絡分享一段五年前佢同李小加於球場較技嘅短片，片中可見兩人惺惺相惜，交情匪淺。如今張華峰喺貼文末段標籤「真小加」同「多謝晒」，好容易令人聯想到李小加。唔知張李兩人嘅友情，會唔會因為今次嘅扣免額而有所動搖呢？