政情：延任通知 月底限期 泛民被睇死 想再坐一年

民主派早前宣布進行民調之後，就似乎冇咩相關嘅消息，本身就話希望呢段時間，可以讓市民多啲時間消化，了解去留雙方理據，仲話會舉行公開辯論，但事實上，多場辯論最終都係口同鼻拗得個吉，嘥晒啲時間，由宣布民調到真係進行民調，時間長到唔少市民都追問個民調去咗邊。

胡志偉：預咗做咩都被批評

直至尋日，梁君彥就喺電台節目上話，拒絕延任議員要喺本月三十號前通知秘書處，就可獲發約一個月開支，以用作結束辦事處和遣散員工。但如果議員決定延任一年後中途辭任，將唔會發放有關款項。咁意味班民主派議員必須在本月三十號前決定去留，唔係就會冇咗筆錢。

慢必日前喺直播中提到，民主派民調要本月廿八號先有結果，但三十號前就要通知秘書處，話係有啲趕，提醒民主派要有幾手準備，如果出嚟結果係超過一半支持者認為佢哋要離任，就真係要信守承諾喎。不過，民主黨主席胡志偉喺接受電台訪問時，話已預料無論民主派最終作出咩決定，都會受到批評，但佢覺得過程中問心無愧。

民調結果似乎已經唔再重要

事到如今，其實胡志偉都講得好白，反正留又畀人鬧，走又畀人鬧，咁梗係選擇留低啦，爭在未講出口話「留低比離開需要更大勇氣」。所以話，乜嘢必須要喺三十號之前通知秘書處，如果唔係就冇得申領結束議辦費用等問題，根本都唔存在，因為人哋一早打算做多一年，個期限係明年九月三十號至真，所以民調結果幾時公布、結果係點，已經唔重要喇！

梁君彥喺節目中仲被問到，會唔會最終只有個位數嘅民主派議員留任，佢就話自己比較樂觀。咁即係就連梁都睇死，應該唔少民主派議員會選擇留低。另外，對於三權分立嘅爭議，梁就話《基本法》中有關行政、立法、司法及行政長官章節提到，行政、立法、司法互相制衡及合作，而喺《基本法》相關文獻、領導人發言等，都睇唔到三權分立字眼，所以只會跟隨《基本法》行事。