中環出更：採樣防感染 龐愛蘭：要睇眉頭眼額
為咗推行全民檢測計劃，政府早前招募數以千計嘅人員負責採樣工作，香港藥學會會長龐愛蘭（Scarlett）就係其中一員。雖然Scarlett嘅老本行係同醫療有關，但都要接受相關嘅訓練。佢話掌握抽取鼻腔及咽喉樣本嘅技巧固然重要，不過首要之務還是確保自己唔會受到感染，因此既要熟習穿卸保護裝備，亦要觀察檢測對象嘅「眉頭眼額」。
點解要留意檢測對象嘅表情變化呢？Scarlett話原來香港有好多人患上鼻敏感，取樣嘅棉棒一旦深入鼻腔就可能引起刺激繼而大打乞嗤，所以當對方一旦皺眉頭標眼水，就要有所準備啦！佢話試過為一位小朋友抽取鼻腔及咽喉樣本，結果對方打咗七、八次乞嗤，先至完成任務。Scarlett嘅胞弟龐寶星係醫生，事前就建議佢要帶備喉糖、潤膚霜同小電筒，因為經常用酒精消毒雙手，需使用潤膚霜以防皮膚爆裂，至於小電筒就有助佢睇清楚檢測對象嘅咽喉，準確抽取樣本。
潘佩璆：咽喉取樣幾乎冇感覺
立法會前勞工界議員潘佩璆，亦有參與全民檢測嘅採樣工作，不過為他人抽取樣本之前，佢自己都要先做一次檢測。潘佩璆話一入到採樣區，採樣員遞畀佢兩張紙巾，一張係用來包住摘下嘅口罩，另一張係打乞嗤或咳嗽時用來掩住口。儘管鼻腔取樣係有些少痕癢，幸好唔算太難受，至於咽喉取樣就幾乎冇感覺。過兩日就到潘佩璆換上一身保護裝備為市民取樣，佢話呢項工作絕不輕鬆，每為一名市民取樣後，就要除手套繼而用酒精消毒雙手，然後換上新手套再為下一位市民服務，而高防水性嘅保護衣透氣性較差，就算有冷氣都焗到全身汗濕，耳仔又被口罩嘅橡筋帶勒得隱隱作痛。佢話由於個人時間、家庭因素及體能所限，只能參與兩日半嘅取樣工作。
扶貧委員會委員劉仲恒（Kevin）早前都有去做檢測，而佢太太就因為臨盆在即，需按醫院要求一星期做一次檢測。Kevin指各行各業都希望盡快回復經營，若果運輸、飲食、美容等行業嘅從業員做過檢測，光顧嘅客人會更有信心。
卓妮