政情：公民講場：K場不准復業 廢官思維脫節

本港食肆由周五起容許四人一枱，麻雀館亦可以重開，當大家以為各行各業終於都可以有限度復業，誰知酒吧同卡拉OK就仍然要關閉。有公司代表曾與食衞局局長陳肇始等官員開過會嘅業界人士，大呻話好失望，又質疑決策官員可能淨係中學時代去過卡拉OK，想像仲係停留喺九十年代，依舊係唱吓歌飲杯檸檬茶嘅地方，其實世界已經變咗喇。同民情脫節，可謂政府嘅常態，譬如早前禁止食肆堂食，搞到打工仔連食晏嘅地方都冇，就知呢個政府係幾咁離地啦！政府高官嘅思維咁落伍，香港發展又點會唔倒退呀？