政情：泛民分裂 劉小麗退出工黨 游蕙禎轉做KOL
曾於二○一六年因「龜速」宣誓就任立法會議員，結果被裁定宣誓無效嘅工黨成員劉小麗，尋晚喺社交平台表示，佢同小麗民主教室都將會退出工黨。
欠債近百萬 游賣古董撲水
劉小麗解釋，一直都希望可以為工黨增添力量，促進左翼回應急速轉變嘅時局，可惜因為各種複雜問題，一直都未有理想效果。所以退出組織後會以另一種方式合作，繼續面對貧富懸殊，匡扶弱勢，爭取民主等。佢強調退出組織並唔代表隔絕，只係尋求另一種方式，喺擁抱相近理念嘅基礎下同行合作，又感謝黨友過去嘅交流。
另一位因宣誓風波而被法庭裁定喪失議員資格嘅游蕙禎，早前被立法會行政管理委員會入稟區院追債，要償還已發放嘅議員薪津約九十三萬港元，及支付行管會嘅訟費。儘管欠債纍纍，但由於有產品商搵佢合作因此轉戰KOL界，收入來源靠買賣古董相機同收藏品。至於做KOL幫產品商賣嘢賺唔賺到錢，據講暫時都未有，又話分享產品主要係希望提升大家嘅生活品味，賺錢只係次要喎。
游仲係議員嗰陣曾經試圖闖入立法會大樓會議室開會，被裁定非法集結罪名成立，被判入獄四星期。佢話在囚期間思考到好多問題，明白到屋企人嘅重要，因此對於是否再度從政，目前都係不置可否，都係希望照顧屋企人同埋還咗債先囉！