政情：政府麻木教材歪曲 習非成是釀亂局

藉口學術自由 做反社會研究

前議員陳鑑林日前出席網上節目，談及香港現況時，就話依家個社會搞成咁係好可惜，佢認為過去廿年嘅教育出現好大問題，知識同常識都歪曲咗，年輕人變得好反叛，同家人意見上若有矛盾就即刻割席，就連父母都唔認。陳鑑林又提到過去廿年社會競爭好激烈，唔少父母因忙於工作，以致對下一代疏於管教。佢認為年輕人血氣方剛，對社會有不滿屬自然現象，若果被誤導去另一個極端，就會對好多嘢充滿仇恨，背離社會現實。佢批評依家有部分教師藉住學術自由去做反社會研究，然而政府又唔管。佢仲話，作為喺香港長時間生活嘅人會感到好可惜，事關未來係靠年輕人。佢擔心情況若冇改變，社會未來將面對非常大嘅破壞。

無視司法問題 傳播錯誤觀點

唔單止教育，陳鑑林亦批評政府喺司法方面，就算出現問題都唔講清楚，久而久之大眾只會接受錯誤嘅法律觀點，以致習非成是。同時佢又指出香港好多方面都好落後，包括創新科技，今日香港已經冇乜獨特嘅存在價值，質疑單靠旅遊、金融同埋服務業，到底可以養活幾多人口。

太遲發現 陳鑑林：解決須重藥

面對目前嘅境況，陳鑑林話問題發現得太遲，認為政府應該要下定決心、放大力度，甚至要落重藥去徹底解決，又指香港已經冇咗跳板呢個角色，係時候去作轉變，唔可以再停留喺舊有嘅思維。其實政府嘅問題都唔係一朝一夕，咁耐以嚟都冇改善，香港遲早真係玩完喇！