中環出更：在家鍛煉體魄 侯志強教孫耍雙節棍
疫情之下深居簡出，亦都可以趁着空閒做吓運動鍛煉體魄。上水區鄉事委員會主席侯志強，得閒嘅時候會同孫仔練功夫，有時仲會大耍雙節棍添。但點解唔打吓波、跑吓步，年紀咁細就要學功夫呢？莫非鄉郊好危險，要食過夜粥先至敢行出街？
侯志強話當然唔係喇，不過佢都承認圍村人喺六、七十年前，經常為爭奪水源或柴薪而動粗，所以昔日嘅鄉村風氣，係會邀請教頭去指導村民練習拳腳功夫，仲話當時係論勇武、講實力嘅歲月。只不過靠惡嘅日子已經過去喇，取而代之係依家講文明，守法律嘅年代，至於習武就成為傳統，只會用嚟強身健體。侯志強話孫仔雖然年紀細，但都需要磨練先可以成長，所以都要藉住習武嚟鍛煉孫仔咁話喎。
陳俊傑孭仔挑戰掌上壓
前區議員陳俊傑就喺社交平台上載影片，片中佢孭住個仔做掌上壓。原來佢係響應網友嘅提名，參加一項為期二十五日嘅掌上壓挑戰，至於孭仔就係為咗增加難度，做咗廿幾下就好似頂唔順，相反阿仔趴喺佢身上，就笑到見牙唔見眼喇。不過，原來掌上壓挑戰唔單止做運動咁簡單嘅。佢喺貼文下方留言話，其實挑戰嘅目的係令更多人關注創傷壓力症候群、焦慮症同埋抑鬱症嘅，與此同時佢仲呼籲大家留意自己同埋身邊人嘅身心健康添。
另外，願景基金會主席甄韋喬就帶咗孫女去大埔海濱長廊附近踩單車。佢話疫情期間日日匿喺屋企都會悶，見有時間就一家人去放鬆吓咁話喎。佢話選擇海濱長廊嘅原因，就係道路比較平坦、近海邊又可以令人心情放鬆，加上人唔算太多。雖然政府宣布喺公眾地方做運動可以除低口罩，但佢話都係擔心「中招」，所以都淨係影相嘅時候先除低一陣咋。至於問到有冇教孫女踩單車？佢就話孫女都想試吓，但得兩歲幾伸長隻腳都未掂到腳踏，惟有等孫女大個啲先算喇！
卓妮