政情：公民講場：建屋大計撞正疫市 房協勿要庫房填氹

香港嘅居住需求向來迫切，經營房屋嘅機構本應「想窮都難」，然而疫市之下，作為非牟利團體嘅香港房屋協會亦告營運虧損，原因係經濟萎縮，房協要為合資格商戶提供租金寬減，加上舊出租屋邨收取嘅租金無法抵銷維修及改善工程成本，投資虧損又數以億元計，都令到業務營運日益嚴峻。喺呢個艱難嘅時刻，房協行政總裁陳欽勉曾揚言，未來幾年將會係房協建屋嘅高峰期！喺財務挑戰之下房協真係要睇餸食飯呀，若果搞到財政大黑洞，要政府幫手填氹就唔係咁好喇。