政情：張志偉拍宣傳片爛尾

有意循社會福利界競逐功能組別議席、香港社會工作者總工會嘅外務副會長張志偉，其選舉總開支達十四萬蚊，當中以選舉廣告開支佔最多，用咗大約七萬蚊。話說佢六月嗰陣就搵咗間製作公司，打算拍一條五至十分鐘嘅選舉宣傳短片。根據合約，成條片嘅製作費盛惠五萬蚊，張志偉可以分三期付款，六月簽約時先畀四成、八月初再畀四成費用，到短片完成先畀埋尾數，製作公司就要按要求，於八月十五日之前要拍好條宣傳片。

之不過睇番張志偉份申報書，淨係見到佢申報簽約嗰陣畀嘅兩萬蚊首期製作費，剩低嘅需付餘額就冇咗下文，睇嚟政府於七月尾宣布選舉延後，以致整個拍攝工作急煞停，條宣傳短片恐怕都爛尾「凍過水」啦！

僅造型照化妝就用咗三千

除此之外，張志偉單單喺造型照化妝方面就用咗三千蚊，仲用咗大約一千四百蚊去裝身，購買恤衫同運動鞋等，睇嚟佢對自己嘅形象都有份執着，一啲都唔敢馬虎！

盧偉國獲經民聯贈三萬三

至於競逐連任嘅經民聯工程界議員盧偉國，選舉總開支都用咗超過十一萬蚊，以租金、辦公室同運輸開支部分佔最多，用咗大約六萬蚊，其中佢租用咗海富中心第一期某個單位一個月，都用咗大約一萬八千蚊。不過，作為經民聯主席嘅佢，就獲得黨捐贈約三萬三千蚊，用嚟支付租金、影片製作、秘書及外勤服務等費用。而佢嘅黨友、同樣競逐連任嘅金融服務界議員張華峰就只係用咗三萬蚊左右，其中選舉廣告開支用咗約一萬五千蚊，佢亦同樣獲得黨捐贈二百大蚊，用作租用經民聯支部辦公室嘅部分開支。

不過，亦有參選人最後一毫都冇申報，當中包括有意出戰勞工界嘅工聯會丘燿誠，以及有意競逐衞生服務界嘅香港公共醫療護士協會主席鄭少萍。