中環出更：擺街站反全民檢測 周庭犯聚遭票控
因應第三波疫情，政府將社交限制收緊至兩人，即使係請願都冇得豁免，以致近來有部分政界人士喺社運活動當中被指違反禁聚令而遭票控。有官司在身嘅前香港眾志常委周庭，尋晚同油尖旺區議員何富榮，係佐敦港鐵站外擺設街站期間，被十多名警員拉起橙色膠帶包圍，最後遭票控罰款。
上月涉違國安法被捕
周庭同何富榮一行六人喺佐敦擺設街站，反對政府推行「港版健康碼」同埋全民檢測，就喺街站接近尾聲時，突然有十多名警員到場包圍，並拉起橙色膠帶作封鎖線搜查，包括登記佢哋嘅資料。最後警方指，周庭同其他擺街站嘅人士違反禁聚令，向佢哋發出《預防及控制疾病（禁止羣組聚集）規例》（第599G章）告票。
周庭喺上月初，因被指涉嫌勾結外國或境外勢力危害國家安全，違反《港區國安法》被捕，在扣查逾二十四小時後獲保釋。
卓妮