中環出更：與檔販熟落顏寶鈴 街市買餸好放心
疫情之下宅在家，最好嘅活動莫過於下廚樂，然而早前有街市爆發駭人聽聞嘅鼠患問題，真係嚇親好多家庭主婦。不過香港中華總商會常務會董顏寶鈴，就話去街市買餸仍然好放心。
顏寶鈴日前趁住馬季開鑼，同家人到沙田馬場為出賽嘅愛駒打打氣。顏寶鈴都有留意街市衞生情況欠佳嘅消息，但由於十幾年嚟都只係幫襯九龍城街市裏面某幾間檔戶，覺得佢哋嘅商譽有保證，成為老主顧自然同幾位檔主都好熟落，從來未試過買到質素差劣嘅食材，因為冇人夠膽呃佢咁話！顏寶鈴又話擔心屋企嘅工人姐姐唔識揀上等貨色，所以到街市買餸多數都係親力親為，呢排更加好積極買餸煮飯，務求家人多啲留喺屋企開飯，減少外出用膳以降低染疫風險。
陳鑑光：逢假日做太太嘅司機
香港模具及產品科技協會理事長陳鑑光，就同太太陳鄭玉而拍拖入馬場。陳鑑光話平時係交畀司機去負責買餸，因為對方買得熟手咁話喎。不過每逢假日，就多數係由陳鑑光做司機，接載太太到街市揀選食材。陳太就話依家都比較注重均衡營養同飲食安全，會小心選購食材，譬如早前有新聞報道指有三文魚出現食用安全問題，佢都即刻提醒工人暫時唔好買住。
中華廠商聯合會副會長盧金榮，就話自從疫情爆發之後加倍注重衞生，覺得超市嘅環境較街市更加乾淨，但係食材就未必夠街市咁新鮮啦。雖然網上購物愈來愈普及，無論日常用品抑或餸菜，都可以足不出戶就送到返屋企，但由於盧金榮試過上網買急凍食品，點知送到嚟屋企先發現質量唔多好，經過教訓之後都唔想再喺網上買餸啦。
卓妮