政情：公民講場：放寬復業標準不一 政府製造失業大軍

政府又再放寬社交限制，有啲早前被勒令停業嘅處所如健身室，終於都可以復業，不過家庭遊樂中心就冇份喇。尋日有業界代表認為政府今次嘅決定令人費解，指幫襯家庭遊樂中心嘅顧客毋須脫下口罩，同員工亦唔會有緊密接觸，屬低風險場所，就算做足防疫措施，惟因牌照屬公眾娛樂場所而冇得放寬，批評政府不問情由迫使業界停業，就算申請政府擔保嘅百分百貸款計劃及保就業計劃，長期零收入之下亦無法擺脫倒閉危機。有份協助嘅批發及零售界議員邵家輝就話曾約見民政事務局促請發放第三輪抗疫基金以解決業界燃眉之急，唔知作為局長嘅徐英偉又聽唔聽到民意呢！