政情：反對勢力充斥 陳健波嘆港百病纏身
香港反修例風波至今仍然未平息，議員陳健波（波哥）批評社會上充斥反對勢力，令香港咁多年以嚟受盡打擊，又認為即使《港區國安法》正式實施，仍然存在唔少隱憂。
全方位拖政府後腿
波哥尋日喺社交平台上載影片，分享對香港局勢嘅睇法，佢話香港縱容咗反對勢力廿幾年，令唔同嘅界別都出現問題，特別係司法、教育同傳媒，甚至可以用已經淪陷嚟形容。波哥批評今日嘅反對勢力已經建立咗全方位拖政府後腿嘅能力，無論中央同特區政府推行任何政策，都一定會有人阻手阻腳，喺唔同媒體抹黑同醜化已經成為指定動作，仲要不斷散播各種陰謀論。
波哥話明白大家對政府係恨鐵不成鋼，希望政府盡快改革，撥亂反正，但佢形容香港咁多年嚟受盡反對勢力嘅傷害，已經係周身病痛，百病纏身。即使已經實施國安法，相信反對勢力只係暫時潛伏，絕對唔會咁輕易罷休咁話。