政情：沙中線爆醜聞後曾退休 韓志強任工程師學會秘書長

事隔兩年後復出

早喺八十年代已經加入政府嘅韓志強，過往曾經出任土木工程拓展署署長，之後就做發展局常秘。就喺佢出任常秘時，以政府代表身份，獲委任為港鐵董事局非執行董事，喺港鐵醜聞爆出後，佢就形容董事局喺多項工程問題被蒙在鼓裏，之後仲「拍拍屁股」走人，成為首名退休嘅有關官員。

工程師學會尋日宣布，韓志強將會喺下周一出任學會秘書長，接替將於下月七日離任嘅阮高馨。韓志強退休後兩年一直都冇乜新動向，而佢喺退休前回顧公務生涯時，就話個別大型項目出現連串事故，唔代表成個業界都出現問題，對於沙中線醜聞隻字不提，唔知隔咗兩年又點呢？