政情：官員缺席 靠書面回覆 區議會被譏淪筆友會

屯門區議員巫堃泰尋日喺Facebook上貼文，話早前就區內問題，喺部分委員會上向相關部門提出質詢，點知相關官員缺席會議。其中佢提到喺上星期工商業及房屋委員會會議，查詢區內私煙同埋白牌煙猖獗問題，點知相關部門唔止冇開會，連書面回覆都係草草了事，連截獲私煙同白牌煙嘅數字都冇，搞到要即場要求秘書處代為跟進，要求有關部門就區內整體走私問題，派代表親自解答。

巫堃泰又舉多個例子，話早前喺區議會動議譴責政府部門，不過政府嘅環境諮詢委員會秘書處就冇提到，只係講該部門有去屯門區議會簡介。佢亦提到，話政府嘅環境諮詢委員會嚟緊有網上會議，不過公眾想參與會議就要去灣仔嘅會議轉播室。面對政府部門做事草率，佢批評政府禮崩樂壞同埋偏頗。接二連三成日畀人批評，睇嚟政府真係要認真檢討吓喇。