政府推出全民自願檢測，但連續幾日嘅採樣人數不足一成，有部分檢測中心仲因為使用率低而需要停用。唔少人都對全民檢測有質疑，繼而唔去預約做檢測。有議員認為反應冷淡，係巿民對政府嘅信心問題，批評政府做嘢唔嗲唔吊嘅態度。
議員田北辰日前參與全民檢測，之後仲拍片講感想。對於政府大力呼籲之下，仍然有唔少巿民唔做檢測，原因並非唔着重健康，而係對政府冇信心！佢又話好明白點解會有呢個想法，仲以駿洋邨延期入伙為例，指當時連酒店都幫手搵埋，但政府態度都係唔嗲唔吊、就算佢嘈咗好耐，依然懶理懶睬。田北辰話政府做任何決定都好，必須要有解釋，如果大家都唔知政府想點，巿民又何來信心呢？
對於有質疑認為，目前未有疫苗，到底檢測有咩用時，田北辰就話因為依家冇疫苗，所以要確保冇染病，又指其實都要靠政府守住關口，事關依家有一小撮人豁免檢疫，如果政府唔守住，單靠市民做檢測同埋遵守禁聚令都冇用。市民對政府冇信心問題都唔係第一日嘅事，次次鬧完都冇乜點改善，多多資源都唔夠用啦！
卓妮