中環出更：廠家研免觸撳𨋢神器 林宣武：推動再工業化
香港作為國際金融中心，過去嘅工業發展亦曾盛極一時。香港生產力促進局主席林宣武指今年出現疫情而導致口罩短缺，本地唔少廠家一呼百應生產口罩，亦願意喺香港開設生產線。林指有廠家研發緊唔使觸碰就可以撳𨋢嘅電子儀器，幫助市民抗疫之餘仲可以推動香港再工業化添！
林建議廠家再工業化要善用科技、數據同設計，產品亦都要夠人性化先會受歡迎，就好似電梯免觸儀器咁切合市民需要。林指出，香港有健全制度同知識產權保護，可以吸引外國公司嚟香港設廠，而貨品賣去歐洲等地時仲可以寫住香港製造，增加吸引力。林又話香港係美食之都，所以喺食物同手信方面有好大嘅市場、而香港生產嘅中藥同保健產品，亦好受華人社區歡迎，另外梗係唔少得個人衞生產品，口罩同保護衣物可謂長做長有，林覺得廠商可以從呢四方面考慮發展生意。
吳宏斌：中國東南亞成最大市場
除咗發展再工業化，香港嘅出口市場都有變化。香港中華廠商聯合會會長吳宏斌指，未來中國同東南亞將會係香港嘅最大市場，相信港人靈活嘅優勢可以應對。吳認為世界重心會慢慢由西方轉到東方，故鼓勵工業家應把握時機開發更多市場。吳又盛讚好多年輕工業家具有國際視野，設計亦都符合大眾口味，非常出色。吳指出工業發展需要較大嘅地方，有賴政府支持同人才輸入，先至可以吸引企業返嚟香港設廠。
創新及科技局局長薛永恒就表示政府當然都要配合，但香港地方少係事實，所以要透過高科技、高智能生產取勝，以及用法律同制度優勢吸引廠商落户。薛鼓勵工業家要畀多啲機會年輕人，又指好多廠家都係一代一代咁傳承落去，而每一代都可以帶嚟新嘅元素。
卓妮