政情：應徵廣播處長 鄧德成盼港台撥亂反正
香港電台（港台）節目立場同表現屢受抨擊，被指偏袒反中亂港人士，外界炮轟廣播處長梁家榮管理不善，政府早前展開廣播處長嘅招聘工作，香港政研會主席鄧德成就喺限期最後一日應徵，希望港台撥亂反正咁話。
現任廣播處長梁家榮表示唔打算續約，任期將會喺明年屆滿，政府於是展開公開招聘同內部聘任工作。鄧德成宣布已經提交申請書，話雖然自己唔熱衷於權位，但認為香港媒體歪風處處，希望可以撥亂反正。鄧曾經組織包圍港台行動，佢話深知自己同港台立場唔一樣，但相信媒體正正要為唔同立場嘅人士發聲。
有關職位招聘條件列明，申請人須曾經任職廣播業或傳媒範疇最少十五年，以及最少十五年任職高層職位嘅經驗，亦須具備領導公營廣播機構嘅能力。鄧話，自己喺國際銀行任職管理職位十二年，更營運緊唔同嘅社交平台，亦為一間傳媒主持節目，相信自己絕對係最適合嘅人選，但最終獲聘與否，就要由相關部門決定。