中環出更：朱嘉盈：疫境可激發同事學更多技能
疫情困擾香港超過半年，幾乎各行各業都陷入水深火熱，要盤生意延續落去就要思考求存方法。網絡烹飪麗人朱嘉盈（Norma）日前出席一個網上論壇分享疫市經營之道，佢認為保持正面嘅思維、勇於堅持同不斷學習新事物，好多困難都可以克服。
Norma話佢間公司喺內地幾個大城市都有線上同線下嘅業務，因疫情致使所有實體店嘅業務都陷於停擺狀況，佢於是同銷售團隊一齊諗計，除咗將線下課程改為網上播放，更有同事為咗短時間內推出線上烹飪課程，身兼拍攝、剪接以及網上推廣等多重角色。Norma指業務遇到困難，反而激發同事由專注某項工作變為掌握多種技能。至於香港嘅業務，就由過去倚重廣告嘅收入模式，轉移至發展電商嘅方向，又將烹飪課程嘅內容轉化成產品，譬如推出即煮食材包。
麥騫譽將研發5G直播機械人
從事機械人研製嘅科技公司創辦人麥騫譽（Mark），因業務屬於生產硬件，就算疫情肆虐員工亦無法居家工作，惟有鼓勵同事多留守公司。Mark話本來係按各行各業嘅應用而研製相關嘅機械人。但當佢喺年初見到武漢宣布封城，就預見香港亦將爆發疫情，於是立即調整業務策略，研製抗疫系列嘅機械人。由於研發程序相當緊迫，就算面對疫市都要增聘人手以減輕同事嘅工作壓力。Mark又話下一步準備研發5G直播機械人，可以作為會議用途咁話。
同場出席論壇嘅嘉賓仲有香港青年創業家總商會董事慕容志輝同主席謝海發。從事STEM教育嘅慕容志輝話，佢哋原本喺教學中心，或者去學校向小朋友授課，但疫情影響下，好多活動被迫取消。因應暫停面對面教學而轉為網上形式授課，其內容同部署亦需要相應嘅調節，導師毋須前線教學，變相多咗時間做教材準備。佢又話會同其他公司合作，嘗試將科學知識同體育運動結合，務求令小朋友透過運動強健體魄之餘，亦順帶領略到科學知識嘅重要性。
卓妮