中環出更：黃傑龍不敗意志 疫境泰然處之
如何樂觀面對逆境實在係一門學問。稻苗學會會長黃傑龍（Simon）指疫情導致百業蕭條，坦承曾抱持全敗嘅諗法，早前計過條數，睇吓全線結業到底要花幾多錢。不過，Simon隨即補充話，只係設想最壞嘅情況啫，又強調逆境之下，做人最緊要係有不敗嘅意志。
Simon日前出席一個訪談節目，話若果大半年前同大家講，全球因一種病毒而陷於停頓，相信好多人都會話編劇嘅橋段太荒謬，然而現實世界就真係咁荒謬！佢認為人生當中竟然遇上咁離奇嘅事件，與其怨天怨地，不如老實去面對。
要避免悲觀咁過活，心態嘅調整至關重要。Simon話自己經營嘅餐飲業務目前只係跌剩三成生意，但係同接近完全停擺嘅旅遊業相比，覺得情況已經唔算差喇。佢又話近幾個月以來，每日都會抽時間做冥想，畀自己放下俗念，深入思考自己所面對嘅問題，又發現所謂成敗，只不過係人生過程之一，明乎此，遇到不如意事自可處之泰然。
同樣係經營飲食業嘅社企創辦人楊大偉（David）亦指今次疫情乃百年一遇，亦值得人類好好反思長期以來嘅飲食習慣。佢話牽涉到抗生素、激素等催谷手段嘅肉食生產，根本就不可持續，環境生態遲早爆煲。
楊大偉：應反思飲食習慣
David話亞洲人對素食往往持負面觀念，令佢喺華人社會推廣綠色飲食，倍感艱難但仍一直堅持，又相信經過今次疫情，全球嘅飲食潮流可能出現根本性嘅轉變。
十大傑出青年Vivek（阿V）作為一位棟篤笑表演者，面對疫情仍然可以保持樂觀心態，佢相信「喜劇等於悲劇加時間」嘅格言，認為目前經歷疫情嘅一代人，幾十年之後或者可以好驕傲咁同小朋友分享當年嘅經驗，細訴佢哋點樣成功捱過疫情。阿V現時以網上棟篤笑代替實體表演，佢話無法觀察觀眾嘅反應，惟有自己幻想佢哋嘅笑聲，仲會自備事先錄製嘅罐頭笑聲嚟氹自己開心添！
卓妮