政情：張崑陽稱已畢業 冇交代是否逃亡英國
《港區國安法》實施接近兩個月，繼多名曾提倡香港獨立或民主自決嘅政治人物逃亡海外，上星期再傳出前「民間外交網絡」發言人張崑陽已離港赴英。喺香港大學修讀中國研究及政治與公共行政學系嘅張崑陽，前晚喺社交平台發文，話自己完成論文，終於畢業，但未有交代自己目前身在何處。
羅冠聰到羅馬唱衰香港
張指，佢篇論文內容主要回顧本土主義同民族主義喺香港發展嘅軌迹，又指香港有好多議題值得研究，希望學術界可以更重視香港嘅研究價值。張又上傳一張喺港大拍攝嘅個人照，地點就標註係港大陸佑堂。
此外，已流亡到英國嘅前香港眾志主席羅冠聰，尋日應對華政策跨國議會聯盟嘅共同主席邀請到羅馬，與意大利前外長特爾吉會面，並到意大利外交部，要求外長迪馬約向稍後時間與到訪嘅中國國務委員兼外交部長王毅，公開表態支持香港。
羅指意大利國會早前已多次明確譴責中港政府強推《港區國安法》，是違反法治、基本自由同有關香港自治嘅國際協議，指外長迪馬約有義務將有關立場堅決同公開向中共外長王毅表達，確保意大利為基本權利及自由發聲。