政情：追蹤疫源 靠市民寫日記 陳漢儀卸膊兼離地
本港第三波疫情，每日確診數字雖稍見回落，但市民對政府處理疫情嘅手法怨聲載道，認為政府未能從源頭堵截個案，仲要「卸膊」畀市民，衞生署署長陳漢儀尋日建議市民，可以寫日記記錄每日行程，呼籲市民喺疫情新常態下要盡力協助政府咁話喎。
現時本地個案中，有三至四成屬於源頭不明嘅隱形傳播，陳漢儀話追蹤緊密接觸者同埋盡快進行檢測，對控制疫情嚟講係非常重要嘅手段，期望市民可以喺目前嘅疫情新常態下，考慮點樣好好協助政府。陳漢儀諗到嘅方法就係建議市民養成寫日記嘅習慣，記錄每日行程，例如坐的士嗰陣抄低車牌，他日若果不幸染疫，就可以大大提升衞生防護中心追蹤緊密接觸者嘅效率咁話。
抗疫失策 怪招百出
之但係陳漢儀呢番言論似乎就好離地喇，舉例嗰陣居然只係諗到市民搭的士，要知道搭的士出入所涉嘅費用，唔係所有市民都負擔到(口架)，況且本港早前都出現的士感染群組，涉及的士司機、司機家人同埋乘客，一般市民為迴避感染風險，如非必要都唔會輕易搭的士喇！莫非陳漢儀唔記得，政府喺上個月將的士司機列為較高風險群組咩？
政府無法阻截感染途徑，反而靠市民嘅日記嚟尋找線索，都可謂本末倒置喇。疫情持續咗大半年，多位專家怒斥政府封關不力，歸咎第三波疫情爆發源頭，好大機會係嚟自獲豁免檢疫人士，包括獲豁免檢疫嘅船員同機組人員，以致有多宗抵港船員同航空公司職員中招。政府就遲遲先跪低，暫停船員來港換班，並規定所有經機場入境嘅人士都需要做病毒檢測。可見專家意見就算餵到埋嘴邊，政府都唔聽唔理，兼且匿埋一角諗啲千奇百怪嘅「抗疫方法」，其實政府搞得掂，又何需勞煩到啲市民要寫日記呢？