政情：林超英：頂唔順開冷氣係心中有鬼
提起天文台前台長林超英，大家一定諗起佢好慳電，尤其喺炎熱天氣下都堅持唔開冷氣，靠一把USB小風扇解暑，有覺好瞓。佢接受傳媒訪問時話，有啲市民覺得頂唔順咁熱要開冷氣只係心中有鬼，但只要習慣咗唔開冷氣，就唔覺有問題。
夫婦靠小風扇消暑
林超英不時都會喺社交網站講到氣候暖化嘅問題，當中亦提過熱夜數目愈嚟愈多，而上個月酷熱天氣警告持續時數破紀錄新高，熱夜數目達二十一日，亦係有紀錄以來最多熱夜嘅月份。
點消暑？佢過去幾年靠一部直徑六吋嘅USB小風扇，喺夜晚為兩夫婦帶嚟「溫柔的風」，耗電量僅二點五瓦特，售價約四十蚊，經濟又環保。
而舊年就有新消暑「武器」，佢太太買咗部水冷涼風扇，開動後屋企嘅氣溫可降低二至四度，雖然耗電量增多，但仍然比冷氣機低。
夜晚出汗，好難瞓得着喎。佢就話夜晚即使微微出汗，但靠着「溫柔的風」，汗會慢慢蒸發，好快解決體溫高嘅問題。