中環出更：官地丟空曬草皮 周浩鼎：地政民政要孭飛
成日都話香港土地供應唔夠，但其實唔少政府用地冇用到，丟空喺度曬草皮。有議員批評喺元朗寶業街有幅政府用地冇人打理，搞到雜草叢生，擔心會惹蚊添，仲質疑政府行政失誤，直斥地政總署同民政事務局應要負責。
通過作休憩地 工程遙遙無期
話說喺寶業街附近有一幅政府用地，仲係唔少街坊行親都會經過嘅地方，但幅地生滿雜草，搞到好荒涼咁。議員周浩鼎（Holden）日前就喺Facebook上話，區議會已通過將呢幅地用嚟做休憩場地，亦已申請區議會小型地區工程撥款，但一直都冇人理、工程亦遙遙無期，畀外界會覺得政府講嘢唔算數。
Holden批評政府唔應該丟空幅地唔理，指政府應該盡快處理幅地嘅發展，佢仲直指民政事務局、負責決定土地用途嘅地政總署都走唔甩，一定要孭飛。社區幹事李啟立就話幅地喺上年曾清理過吓，包括移除啲樹、雜草同埋垃圾，不過事隔八個月就故態復萌。
講開又講，其實香港都有唔少政府用地，呢幅睇嚟都只係冰山一角，唔知今次政府係走漏眼，定係冇心做喇！
卓妮