中環出更：夫妻恩愛秘笈 何偉權：互相遷就
人海中尋找到另一半，陪伴到老都係上天緣分安排。前排同香港睦群助更生協會創辦人何偉權傾開，問到點同太太慶祝「七夕」情人節？佢話疫情下都唔會出去食飯，留喺屋企好啲，況且太太比較內向，唔係好鍾意節日去慶祝，反而平時畀啲驚喜佢，送吓禮物氹吓佢開心，佢仲鍾意。
咁點樣畀驚喜太太呀？何偉權話試過有一次，當時太太同個女住喺加拿大，撞啱太太過兩日生日，所以佢就同個女夾計送個驚喜畀太太。自己喺香港飛過加拿大，叫個女去機場接佢機，之後靜靜雞入屋，企喺佢後邊嗌太太，一轉身就送紮花畀太太，搞到佢不知幾開心，何話結婚都成三十年，要維繫感情一定要互相遷就，就咁先可以恒久恩愛，咁就日日都係慶祝。
金鈴喺屋企食飯過節
有「金槌拍賣官」之稱嘅金鈴就話自己好重視節日，會喺屋企食飯過節，以前未有小朋友就二人行，依家結咗婚有埋小朋友就變成四人行，好多時慶祝節日都會一齊，即使情人節都會同佢哋一齊過，因為小朋友都係佢嘅小情人，問到佢同老公相處之道，佢就話兩個字「包容」，大家等火氣過咗之後，再坐低慢慢傾一定有解決辦法。
香港道教聯合會副主席葉映均喺過去幾年都致力推動七夕活動，例如會喺球場空地辦園遊會。灣仔區議會前副主席周潔冰日前訪問葉映均，葉認為七夕可以非常多元化，唔單止可以用詩詞歌賦對愛人表達愛意，仲可以自製針線飾物，既可祈求姻緣，亦都係求功名嘅好時機，希望可以畀多啲年輕人接觸到七夕文化。佢又話七夕帶出珍惜同關懷嘅文化，正正非常適合疫情之下多啲關心身邊嘅人。
卓妮