政情：公民講場：靠政府紓困死得 不如攞MPF應急

因應受疫情重創嘅經濟狀況，政府雖連番推出紓困措施，不過都有唔少人批評措施有漏洞。有政黨日前建議政府容許市民，以一次性方式提取僱員供款部分嘅強積金（MPF），上限為十萬元或者係累計權益嘅百分之五十。議員葛珮帆認為，依家政府嘅財政儲備因疫情關係而不斷下降，兩輪防疫基金同埋財政預算案加埋都近三千億，擔心政府唔知仲有幾多個三千億可以派。佢仲話，商界都認為僱員動用自己供款部分嘅強積金，對日後退休影響有限。既然依家政府都苦惱緊點樣救市，倒不如認真咁諗吓，畀打工仔得到及時雨好過啦！