政情：盼消誤解 公開大學徵求新校名
香港公開大學學生會尋晚喺社交網站發文，指大學校方尋日向全體公大學生發電郵，電郵提到校方為配合大學策略性發展，經過一連串諮詢後，決定成立「大學名稱評選委員會」，邀請所有公開大學（公大）成員同公眾人士為大學新名稱提出建議，有意者可於下月三十日前將新校名建議提交至指定網站。
非僅得遙距教育成人兼讀課程
貼文中又提到，有關委員會收集校名建議之後，將進行評選，最終會提交一個合適嘅名稱予大學校董會作審批。如果相關建議獲校董會通過，隨後將啟動修改大學條例嘅程序，以使大學可以正式採用新名稱。
查實公開大學早喺舊年已經開始探討其定位問題。指社會上有人誤以為公大仍然只係提供遙距教育，或主要開辦畀成人嘅兼讀課程，仲形容呢啲誤解引起咗唔少問題添！
校方於是向學生、校友及教職員作廣泛諮詢，而透過唔同形式嘅諮詢活動所收集嘅意見顯示，大多數人支持大學重新命名，又於上個月成立「大學名稱評選委員會」，所有收集得嘅大學名稱建議，將交由委員會審議及評選。委員會會提交一個最合適嘅大學新名稱予大學校董會審批，隨後將啟動修改大學條例程序，呈交立法會作正式審批。