中環出更：侍產假得5日 區議員轟少得離譜
政府去年將男士法定侍產假由原本三日增至五日，但喺有對比嘅情況下似乎顯得好少，事關葵青區議員梁錦威日前喺勞工處網站公開招聘議員助理，提供十四日男士侍產假，仲有生日假及生理假。梁錦威話，政府五日侍產假真係少得離譜，照顧初生嬰兒及妻子係絕對唔夠，認為十四日先至足夠。
話好多團體撐要有14日
梁錦威提到，其實好多勞工團體都支持要有十四日男士侍產假，呢個係對勞工嘅基本福利咁話，佢仲話自己過去請助理都係用呢個為標準。但其實到現時為止，都未試過有男員工申請放侍產假，如果真係有需要嘅話，相信呢啲假期就能夠幫佢哋一把咁話。
至於生理假，梁同樣話過去女同事都一直都享有呢個福利，一個月可以放一日假，但就從冇出現濫用情況，大家都好自律，真係有需要時先會放，對議辦實際運作又冇咩大影響。
卓妮