中環出更：服裝氾濫 非洲都唔要 楊國榮：時裝都要可持續發展
近年Fast Fashion（快時尚）興起，時裝店生意貨如輪轉，大家衣櫃入面嘅衫幾乎每個月都換畫，不過太多衫都可以係一種浪費，對地球嚟講更係一種負擔添。因應消費者嘅環保意識有所提高，近年時裝界都推崇加入環保物料製造、可降解嘅「可持續發展」衣服。然而本港消費者仍然停留喺「見平就買」嘅階段。幾位成衣業人士日前聚埋一齊開咗個論壇，傾吓點樣推動「環保衫」成為主流。
製衣業訓練局總幹事楊國榮（Phillip）就話，「衣」係每個人嘅必需品，以前香港人有唔要嘅衫，通常都會捐畀落後國家，但依家係服裝氾濫到連非洲都唔收。Phillip話佢哋教學生，成日話要令時裝業要配合可持續發展，但反觀自己作為消費者時，都未必做到buy smart（精明消費），好似Phillip出席論壇嗰朝，打開衣櫃先至發現原來入面仲有幾件連包裝袋都未拆嘅衫，令佢反思「我哋係咪真係需要咁多衫呢？」原來Phillip有時都會同學生取經，了解「環保衫」喺香港唔成氣候嘅原因。至於學生嘅見解，就係對於Fast Fashion嘅衫，唔介意只得一次着上身嘅機會，因為港人居住環境較為狹小，但又想着多啲唔同類型嘅衫咁話。照咁講法，想推動「環保衫」除咗教育之外，睇嚟生活空間都好重要。
李國本：環保衫潮流需消費者帶動
其實「可持續發展」衣服除咗環保之外，講到尾都係一個社會責任。身為製衣生產商總裁嘅李國本雖然都係咁諗，但佢就大呻生產商始終處於整個成衣業生態嘅下游位置，要帶動業內做好「環保衫」嘅潮流，最終都要由上游嘅「消費者需求」做起。
至於同場嘅時裝界名人鄧婉穎都認為，時裝要做到「可持續發展」，個人責任絕對係重要一環，如果人人都唔介意畀多少少錢買「環保衫」，相信時裝生態都會有所改變。
卓妮