政情：海報被捉錯字 區議員罰抄十次
本港第三波疫情大爆發，為咗避免人群聚集，唔少區議員都急急腳喺社交平台貼文，或者落街貼Poster（海報），宣布暫停開放區議員辦事處。但估唔到咁簡單嘅嘢都會「甩轆」喎。
元朗區議員李俊威日前喺Facebook貼文，話有街坊提醒佢之前有關辦事處暫停服務，直至另行通知嘅Poster，將「暫停服務」錯誤寫為「暫服停務」。佢就話多謝街坊提醒，即刻罰抄十次以示知錯，見佢喺張Poster上面手寫十次「暫停服務」。
出街逾一個月先知
雖然肯認錯係好事，但細心啲睇番張Poster，上面寫住辦事處由七月十三日起暫停開放。換言之，張Poster出街已超過一個月，但李俊威竟然依家先發現寫錯字，係咪遲咗啲呢？唔知佢係呢排太忙所以冇睇番，抑或遲遲未有人發現出錯呢？