中環出更：立會掟臭彈罰錢 慢必還咗峯鴿朱凱廸走數
人民力量議員陳志全（慢必）、民主黨議員許智峯（峯鴿）同議會陣線議員朱凱廸三人，先後喺五月廿八日同六月四日，喺立法會會議廳同會議室「掟臭彈」同「淋臭水」，破壞立法會財物，立法會行政管理委員會早前向三人追討清潔費。慢必日前向立法會還咗約十一萬一千元，而峯鴿就堅持唔還，所以就畀立法會扣起工作開支喇！
陳稱唔還就冇錢出糧
身兼行管會主席嘅立法會主席梁君彥，早前表示會向峯鴿追討合共五萬二千元嘅清潔費，而慢必同朱凱廸則被追討六月四日嘅清潔費唔少於十萬元。慢必話若果唔還錢，立法會就會暫停處理佢嘅工作開支，變相佢得唔到嘅錢比佢要還畀立法會嘅錢仲多，佢亦都會冇錢出糧畀同事同助理，還完錢後佢同立法會之間就會一筆勾銷，佢亦可以拎番工作開支。至於峯鴿就話唔同意還錢，畀秘書處扣起工作開支，會向秘書處提出會循司法程序上訴。
秘書處回覆本報查詢指，行管會早前已指示秘書處，以未發還予三位議員的工作開支抵銷佢哋拖欠嘅款項，而期間秘書處會暫緩處理佢哋嘅工作開支償還申請，直至佢哋全數付清拖欠款項。秘書處話峯鴿和朱凱廸已經同意上述安排，而慢必就以支票支付相關費用。
卓妮