中環出更：疫下專注創作 何博欣：畫畫如呼吸 不可或缺
藝術存在喺生活嘅每一個角落，藝術同時對每個人嚟講都有唔同意義。今年東華三院適逢創院一百五十周年，舉辦滑板藝術網上慈善拍賣，當中邀請到插畫藝術家何博欣（Vivian）為拍賣創作，希望可以結合慈善同藝術嘅元素。
對於Vivian嚟講，藝術當然係不可或缺嘅，佢更加形容畫畫就好似呼吸一樣，係屬於佢生活嘅必需品。佢話喺創作嘅過程中就好似寫緊一篇抒情文，可以喺當中表達自己嘅情緒。Vivian話喺疫情下令佢有多啲時間「修身養性」專注創作，但其實來來回回不斷改良畫作，都需要好多時間同精力（口架）！
其實藝術亦有紓緩情緒嘅作用。東華三院賽馬會復康中心副院長楊美玲話傷殘人士可能唔擅於用語言表達自己，而藝術就係畀佢哋抒發情緒嘅渠道，佢提到有位自閉症同輕度智障嘅院友，面對外面嘅轉變同嘈吵嘅環境，都會對佢造成壓力，但見到佢接觸咗創作之後，情緒明顯變得穩定。楊美玲同時希望社區有更多空間，令更多人關注傷殘人士嘅作品，從而走進佢哋嘅內心世界。
文頴怡：藝術無疆界
東華三院董事局主席文頴怡同執行總監蘇祐安覺得藝術無分疆界，可以拉近人與人之間嘅距離，可以同慈善活動完美融合，吸引唔同界別嘅善長人翁。文頴怡覺得做善事都唔可以一成不變，今次嘅慈善拍賣以滑板藝術做主題，展現活力嘅一面，希望可以同時吸引年輕人支持活動。
卓妮