政情：公民講場：電動移動工具通街走 遲未規管使用真荒謬

可作為代步用途嘅電動個人移動工具愈來愈普遍。但係政府長久以來都未有正視，既無諗過為有關工具登記及發牌，只係一味重申不宜喺行車道、行人路及單車徑上使用，咁即係等如邊度都唔用得喇。其實坊間早有聲音要求政府參考其他城市訂立規管制度，喺舊年都有議員就此向政府提問，當時運輸及房屋局局長陳帆就話運輸署嘅「提升香港易行度顧問研究」會涵蓋有關議題，查實去到依家都只係話擬修例規管咋！為早日結束電動個人移動工具准買不准用嘅荒謬現象，麻煩政府唔好歎慢板，陳帆都要努力啲鞭策下屬做嘢啊。