政情:銅芯口罩濾芯過期 陳克勤批政府虎頭蛇尾

政府防疫一直歎慢板,市民亦唔滿意政府遲遲先向全民派發口罩。議員陳克勤批評政府當初聲稱會向市民再派發銅芯口罩濾芯,但到依家都未見影。

推出時預告會定期替換

政府五月初推出銅芯口罩,話可以洗六十次。克勤話,由第一批領取口罩嘅市民計算,口罩濾芯早已超出使用壽命,而政府當初推出口罩時,明明預告會畀市民定期替換濾芯,以確保維持防疫效果,但到依家都未見當局提出替換濾芯嘅安排。

克勤狠批政府推行政策虎頭蛇尾,質疑政府到底有冇心服務市民,仲話已經去信有關當局,促請政府安排換「芯」。睇嚟政府推行抗疫工作唔單止慢幾拍,就連當初嘅承諾亦無意兌現。其實唔少政府高官,包括特首林鄭月娥都有使用銅芯口罩,唔通濾芯過期都照用?定係高官有特權,有無限量口罩同濾芯替換呢?

第一手消息請下載on.cc東網iPhone/iPad/Android/Windows Phone Apps