政情：林鄭主動放棄劍橋名譽院士銜
近日有份被美國財政部制裁嘅特首林鄭月娥，尋日通知行政會議秘書處，刪除佢喺行會個人利益登記冊上，有關英國劍橋大學沃爾森學院名譽院士身份嘅項目。後來林鄭喺Facebook專頁表示，今次係佢主動放棄有關名銜。
林鄭指，學院院長喺舊年修例風波後去信畀佢，話有人要求學院取消其名譽院士，於是佢回信詳加解釋，但上個禮拜院長又再來信，指學院認為佢偏離學術自由同言論表達自由嘅原則、處分批評政府嘅老師、阻止學生喺學校唱歌同叫口號、執行有域外效力嘅國家安全法律等，要求她答辯，否則就取回名譽院士名銜。
稱被學院誣衊 十分失望
佢認為呢啲都屬於「莫須有」嘅指控，為咗維護特區政府同特首嘅尊嚴，日前再次去信反駁，包括指出香港各大學享有嘅學術自由同院校自主、大量學生違法被捕、英國維護國家安全法律中有相同嘅域外效力條文等事實。佢又喺結語中表示對於學院以毫無事實根據、道聽途說嘅態度去誣衊別人，感到十分失望，因此亦難以說服自己繼續與沃爾森學院有任何聯繫，故一併把名譽院士名銜退回。