中環出更：被指擁雙重國籍 盧偉國謝偉銓斥無聊炒作
前香港眾志秘書長黃之鋒不滿被選舉主任取消參選資格，反指各政府官員，以至議員持有外國國籍先至係準備隨時走人，並非真誠效忠特區政府，其中議員盧偉國同謝偉銓就被點名狙擊，指控佢哋分別擁有英國國籍同居英權。
盧指幾年前已申請退籍
黃之鋒指盧偉國持有英國國籍，但盧澄清話當年申請英國護照只係方便去歐美公幹，但喺當地並無任何投資同物業，而且喺幾年前早已經申請退籍，並退回護照。盧批評「反中亂港分子近日無乜嘢好搞」，先攞番佢持有英國國籍嘅事嚟說三道四。
謝偉銓（Tony）直斥黃之鋒純粹想炒作，話要睇清楚邊啲人先係呼籲外國制裁香港，要求外國勢力攻擊自己國家。佢話自己咁多年嚟的確都留喺香港，最重要係為香港做實事，而唔係單純以是否擁有外國國籍嚟評論一個人。Tony又呼籲呢個時候香港人要齊心重建經濟同民生，唔好理會無謂嘅炒作。
事實上，立法會條例容許十二個功能界別於持有外國居留權嘅情況下擔任議員，睇嚟黃之鋒的確係無聊無嘢做先攞嘢嚟講喇。
卓妮