中環出更：張滿榮有教無類 耐心對待SEN小朋友
有教無類不但係孔子嘅主張，亦係聯合國可持續發展（SDG）十七項目標之一。維多利亞青年商會今年首次舉辦SDG企業大獎，服務對象包括特殊教育需要（SEN）小朋友嘅運動教育機構「天盛道場」就係其中一個得獎者，其創辦人張滿榮話教導SEN小朋友的確要好有耐性，又呼籲大家喺公眾地方若果遇到自控能力較低嘅小朋友，請勿動輒斥責，因為佢相信家長已經用盡方法，假如陌生人講一啲難聽嘅說話，對家長同小朋友都會構成好大嘅傷害。
張滿榮話唔少報咗興趣班嘅SEN小朋友家長同佢反映，話往往只係上得一、兩堂，導師就好委婉咁話貴子女唔適合呢個課程。不過諗深一層，到底係小朋友唔適合，還是導師唔識教呢？張滿榮話有見及此，佢將會推動運動教練同導師，去學習同SEN小朋友嘅相處方法，從而提供更多嘅課外活動，透過身體刺激腦袋，得以同一般嘅小朋友一樣，有一個愉快嘅童年。
譚沛楹：消費決定影響環保
另一個得獎機構，社企「綠行俠」就着眼於負責任消費同生產，以創建可持續發展城市。業務發展總監譚沛楹（Peann）話每一個人嘅消費決定，都有機會影響到環保嘅方向，而佢哋就正進行全城咖啡渣回收行動，將本來屬於棄置物嘅咖啡渣，製作成香梘、花盆，又或者發酵為肥料。至於收集咖啡渣嘅渠道，Peann話咖啡店所佔嘅比例並非如想像中咁大，反而企業嘅寫字樓先至係最大宗，平均每星期收集到六十至一百公斤，由此可見上班族嘅咖啡消耗量頗為可觀。
維多利亞青年商會會長陳盈盈，指經濟增長、社會包容、環境保護，係達到聯合國可持續發展十七項目標所必須協調嘅三大核心要素，而佢哋喺今年年初所做嘅問卷調查得知，受薪階級都好重視社會包容同環境保護，又認為企業發展若符合可持續發展目標的話，員工對公司嘅歸屬感就會倍增。
卓妮