政情：港台顧委會主席 林大輝接棒
現任香港電台顧問委員會（顧委會）主席陳建強即將退任，而政府尋日宣布，委任身兼香港體育學院主席及香港理工大學校委會主席嘅林大輝做新一屆顧委會主席，任期由下個月一日開始，為期兩年。
顧委會喺二○一○年成立，陳建強就喺當年加入，二○一六年仲獲委任為主席，任內經常針對港台嘅種種陳規陋習，又對反映節目意見嘅來函嚴肅處理，強調港台應按《香港電台約章》（約章）規定，所有節目必須有事實根據及公正持平。商務及經濟發展局局長邱騰華亦認同陳對顧委會所作嘅貢獻，又相信林大輝喺公共服務方面擁有豐富經驗，期待林大輝可以帶領顧委會協助港台全面履行約章。
團體指改革刻不容緩
公營廣播關注組召集人彭長緯就認為，依家港台千瘡百孔、問題叢生、改革已屬刻不容緩。佢哋期望林大輝出任主席後，以最大嘅魄力同耐力，帶領顧委會督促港台嚴格恪守約章，履行港台作為公營廣播機構嘅使命。到底林大輝能否不負眾望呢？咁就真係要拭目以待喇。