中環出更：養珠唔止可以戴 王俊傑：蚌肉可整XO醬

早前城市青年商會舉辦創意創業大賞，介紹唔同嘅「香港製造」品牌，幾間獲獎公司都離唔開飲食業務添！其中王俊傑（David）同拍檔創辦養殖珍珠嘅公司。養珠唔係新興行業喎，創意就係教育市民認識珍珠廣泛嘅用途，唔講唔知仲可以食嘅，因為可以用珍珠蚌製造XO醬，珍珠貝殼仲可以用嚟過濾水質，推動環保。

香港有「東方之珠」嘅美譽，David話希望透過珍珠教育同養殖，令香港成為「世界之珠」。David仲話自己得以創業養殖珍珠，都要多得太太養住屋企嘅三隻「豬」。講嘅當然係佢三個小朋友喇！

王俊傑唔止養殖珍珠，仲發展珍珠教育同導賞團。	鄧志傑推崇健康有機生活，餐廳食物有機又無味精。	孫曉欣希望喺疫情期間，大家唔使出門就可以享用優質美食。

孫曉欣做埋員工飯盒生意

之前講開XO醬，當然聯想到美食。近年唔少人崇尚健康飲食，餐廳創辦人鄧志傑（Larry）連同本地農夫、廚師同營養師，為客人提供無味精、無雞精嘅健康有機食物，仲會列明食物含有幾多卡路里，務求令大家食得安心。Larry話未來會同外賣平台合作，將餸菜送上門，希望大家可以用最低成本食到最有營養嘅食物。

唔想出街食，食住家飯又唔使自己煮，咁就可以Call私人廚師上門煮。創辦人孫曉欣（Fanny）話希望大家安坐家中就可以享受優質餐飲，同時幫廚師創一番事業。Fanny話私人廚師收到Order就會買食材，再去到客人屋企、會所，甚至遊艇等地方烹調。因應疫情發展，Fanny開拓新業務喎，就係幫公司整員工飯盒，等員工唔使四圍撲，可以食番啖安樂茶飯。

卓妮