政情：議辦貼反國安法海報 譚凱邦：係民主派職責
有讀者早前行過荃灣區議員譚凱邦（Roy）位於馬灣嘅議員辦事處，發現Roy喺辦事處嘅玻璃幕門上張貼咗多張宣傳海報，其中一張就寫住「反對國安法」等字句，批評佢明目張膽反對《港區國安法》。Roy回應本報查詢時，確認呢張海報確實存在，又提到建制派政黨亦會喺議辦外張貼撐政府嘅海報，覺得展示反對港區國安法嘅海報係民主派議員嘅職責咁話喎！
稱不會理DQ紅線
Roy話，其實佢反對港區國安法嘅立場係非常清晰，而且有好多傳媒都報道過呢件事，又提到佢所屬嘅馬灣選區內亦都有好多居民反對港區國安法，認為展示相關海報係民主派議員嘅職責，覺得係好正常嘅事情，仲提到建制派政黨都會喺議辦外張貼撐政府嘅海報啦！早前立法會選舉提名期間，選舉主任以參選人原則上反對港區國安法為由，取消多人參選資格（DQ），Roy就覺得呢啲DQ紅線成日都會改，佢自己唔會理咁話喎！