中環出更：盂蘭勝會疫下難舉行 胡炎松：拜神最緊要有心
中國傳統文化好講孝道，而每年八月下旬嘅盂蘭勝會，就係中國人敬祖弘孝嘅重要活動。礙於疫情，推廣盂蘭文化不遺餘力嘅香港潮屬社團總會常務會董胡炎松話，今年好多地區嘅盂蘭活動難以舉行，例如盂蘭文化節就要取消。但正所謂「祭如在，祭神如神在」，佢話拜神最緊要有心，所以咪大有大拜，細有細拜囉！
胡炎松指內地封關，神功戲戲班落唔到嚟，康文署未答允借出場地，加上禁聚令收緊限制，都令到唔少地區嘅盂蘭團體，停辦今年嘅盂蘭勝會，改為喺自己嘅會址或廟宇拜吓神，燒吓衣紙就算。但亦有部分盂蘭團體，計劃以縮減規模嘅方式嚟進行盂蘭活動，譬如以往拜神同唸經儀式要進行三日，今年就只做一日。不過胡炎松都打算去拜候吓各個盂蘭團體，了解吓佢哋嘅情況，再將活動相片喺網上分享。胡指喺上世紀初二戰前，市民都係以燒衣紙同插香，比較家庭式嘅方法嚟進行盂蘭活動，正所謂大有大拜，細有細拜，最緊要都係有心啫。
除咗盂蘭勝會，每年香港都會舉行嘅客家文化節，亦因疫情因素，未知可否如期舉行。香港客屬總會會董、上水鄉事委員會主席侯志強話，搞唔搞得成，真係要「問天」喇！佢話去年客家文化節規模龐大，籌備費用都使咗幾百萬元，但依家未知道疫情發展，加上政府禁完呢樣禁嗰樣，所以客屬總會都未開始討論或者籌備。不過，侯志強都話應該避免人群聚集，如果要舉行活動，都需要「睇定啲」先。
趙式慶網上分享客家武術
面對疫情，熱衷中華文化嘅香港文化節創辦人趙式慶都只能係網上同大家分享客家武術。趙指客家武術分為三個唔同階段嘅發展模式，有早期嘅原生模式，中期嘅流動模式，同後期嘅都市模式，而早期嘅客家人以務農為主，所以將生活融入武術，好似客家嘅棍術文化，就係來自農務用到嘅擔挑、鋤頭同大耙。而大耙更加係好重要嘅兵器，係客家武術表演嘅最後環節出現，通常仲係由大師兄或者師傅表演添！
卓妮