政情：有相為證：拉低口罩周街走 藍鴻震：冇驚過
新冠肺炎疫情肆虐，政府早前更宣布擴大口罩令嘅適用範圍，市民由上周三開始，無論室外或室內嘅公眾地方都要戴上口罩。就喺口罩令收緊嘅第一日，本報記者就喺金鐘港鐵站通往政府總部嘅行人天橋，遇到民政事務局前局長藍鴻震，見佢口罩拉低至下巴位置，急急腳行緊去海富中心方向，到底佢係咪嫌天氣熱，長時間戴住口罩好唔舒服呢？
被記者撞見 即戴番好
藍鴻震就笑笑口話唔係。當記者再追問佢點解唔戴番好個口罩，佢就即刻拉番高個口罩戴番好，仲笑住話「係咁意啦！」至於口罩並無遮掩口鼻，唔驚會受到感染，或者畀執法人員票控咩？佢就話唔驚喎，「驚乜嘢，冇驚過！」又話啱啱先至去完立法會，之後就落天橋離開喇！