政情：踩界宣傳遭舉報 清潔龍嗌金盆洗手
食物環境衞生署嘅虛擬清潔香港大使，清潔龍阿德早前喺社交網站Instagram放上泳裝女郎相片，最後貼文被舉報移除，同之前喺Facebook嘅貼文一樣冇得留低。
十幾日前清潔龍喺Facebook同Instagram貼上同一張性感女郎泳裝相片，內容寫住「我叫Aedes albopictus伊伊，我住在一個草地旁邊。要約直接見面嗎？輕輕咬你耳朵」，仲附有一條連結，邀請大家「快看我的調皮視頻」。原來清潔龍專頁唔係被黑客入侵，而係宣傳登革熱資訊，不過似乎太踩界，Facebook嘅貼文旋即因舉報而遭到移除。
原來係叫人勤洗手防疫
事隔咗一個幾禮拜嘅時間，Instagram貼文都走唔甩，同樣因為內容牽涉裸露或性行為而被移除。清潔龍回應話正式宣布金盆洗手，搞到有人以為佢從此退出社交平台，但原來佢講緊嘅係疫情之下要勤洗手，叫大家要最少洗二十秒，先至預防到病毒同細菌。