中環出更：執完議辦先延任 黃國健：唔會復原
隨住政府日前宣布立法會選舉延期一年舉行，意味着今屆立法會任期有可能順延一年，多位原本打算退下火線嘅議員，一夕之間可能又要繼續任期，議員黃國健（KK）就係其中一位，不過佢就坦言自己已經一早收拾好議員辦公室，即使延任一年都唔會復原啦。
早已表明不尋求連任嘅KK笑言，自己一早收拾好議員辦公室，清空抽屜及書架等，並將文件入箱，以便隨時「郁得」。雖然如今需要延任一年，但佢就話應該唔會將辦公室恢復原狀，感慨執一次都夠煩。
料來年繼續有糧出
對於延任一年議員係咪照樣出糧，KK就話，立法會須審議重要法案，好似每年一度嘅財政預算案及其他緊急法案，議員須隨時候命出席會議，所以唔可能處理其他工作，政府冇可能唔向議員提供薪津。加上財政預算案等重要法案，需要議員助理協助搜集資料及分析，若果冇營運開支，就冇辦法處理有關工作咁話。
卓妮