中環出更：香港製造具潛力 工總睇好食品工業
隨住工業外移，傳統嘅製造業喺香港難以生存。雖然政府同業界人士都致力推行香港再工業化，不過香港工業總會主席葉中賢就話，其實仲有幾個工業種類長期扎根香港，譬如印刷、珠寶、環保回收同食品製造，相較之下，印刷同珠寶業嘅規模較細，至於食品業既有相當規模兼且好有潛力。工業總會就喺日前嘅理事會上，選出林世豪做第七位副主席，期望以佢嘅經驗，可以喺香港再工業化嘅過程中，推動本地食品工業更上層樓。
葉中賢指疫情肆虐全球，各國嘅經濟都大受打擊，自然不利於消費市道，外國好多大型零售商都陷入艱苦經營，因此今年嘅訂單數字並唔樂觀。佢建議業界不妨將目光轉向新興市場。
陳岳成嘆人才難得
至於從事米業近三十年嘅林世豪，就話香港嘅食品業宜利用新科技同自動化技術，將生產過程推向更高層次。雖然港人都好支持本地製造嘅食品，然而市場規模始終有限。佢話消費者對於香港製造嘅食品，零舍有信心。譬如每逢中秋節前夕，內地人都會大量搜羅香港月餅，就知香港食品業好有競爭力。所以佢覺得香港食品業要把握呢方面嘅優勢，將業務推向國內或東南亞市場。
雖然自動化生產同開拓內地市場，係可以將公司嘅發展推上新台階，但香港餐飲聯業協會會董陳岳成就認為，並非所有香港食品工業都具有邁向自動化生產嘅條件，因為自動化生產嘅設備通常體積龐大，部分工業大廈嘅升降機無法容納，更遑論搬上十幾層樓高嘅工場之內。而就算容納得到，亦勢必增加工場面積以致付出更多嘅租金成本。而先進嘅自動化設備，亦必須相關嘅機電同食品科學專家配合，然而呢兩類人才喺香港相當難得。佢又話唔懂得內地法規同稅制，開拓內地市場可謂困難重重。陳岳成認為欠缺有利條件之下，香港食品業憑長期堅持誠信同產品質素，贏取廣大消費者對「香港製造」嘅信任，可謂成就不凡。
卓妮