政情：公民講場：教局臨暑假先嚟贈閱 學校趕唔切畀學生

教育局上月推出計劃，向學校發放一筆過津貼，以購買實體圖書予學生於暑假閱讀。本來鼓勵閱讀係好事，然而必須按局方指定嘅書單揀書，學生冇得選擇之餘，又欠缺英文以及其他適合特殊學習須要嘅書籍，而適合三歲幼兒嘅讀本竟包含喺中學書單之內，就真係費解。但最令人詬病嘅係，校方只得十三個工作天去選書同進行落單工作，結果好多學校都無法趕及喺暑假前，將圖書送畀學生。教育局今次嘅贈閱計劃既倉促又限制多，倒不如簡簡單單派發書券，畀學生自行選擇自己喜愛嘅圖書仲好喇。