政情：大熱天時坐街食飯 黃梓謙話一日都嫌多
因為政府日前宣布全港食肆禁堂食，唔少打工仔就要「坐街」食飯，部分人甚至因為搵唔到位而要「跪街」食飯，雖然最後政府跪低，宣布今日起食肆恢復日間堂食服務，但平等機會委員會委員黃梓謙（Gary）就喺社交平台鬧爆政府冇同理心，話錯誤嘅政策、一日都嫌多呀！
「食餐安樂茶飯都唔得」
話說Gary尋日外出工作，到食飯時間但附近冇避暑中心，惟有到街市買個飯盒到屋邨平台，大熱天時坐喺鐵櫈上面食。佢話食飯嘅時候回想起細細個喺屋邨嘅生活，當時為咗爭取多啲時間打波，都試過求其食啲嘢算數。只不過，佢話對於打工仔嚟講，禁堂食嘅政策搞到打工仔連「疫境」中食餐安樂茶飯嘅權利都冇，隨即大鬧政府冇同理心，完全冇諗過疫情下都仲有好多人需要返工囉。
唔單止咁，Gary仲話錯誤嘅政策、一日都嫌多，批評政策離地。佢促請政府日後制訂新政策嘅時候，要顧及基層、有錯則改，話咁先係一個具有承擔嘅政府。